फूलदेई
फूलदेई – फूलदेई ऐगे फूल संगरांद
सुफल करो नयो साल श्री भगवान
उल्यारी झुल्यारी मुलक चळा गेैल्यों फुलुक
रंगीळे फांगुण जैगे नाचदु मैनु चैत ऐगे
नया साल की बार चैदिसांे छ उळर
ग्वीराल साकिनु मालुक चल गैल्यों फुलुक
सर क्यार बिटा कण्डुल्यों लीक हिटा
रमकैक झमैक बसंत गीत गैक
लगडी तुसरी चूलक चल गैल्यों फूलुक
कण्डोल्यों भरि फूल ल्योळ डेली डेल्यों सजळे
जसिळ होन दिन बार भर्यां रौन भण्डार
आरू बुरांस फ्योंलिक चळ गैल्यों फुलुक
आव अठवाड मनौळ आटु कु गुड चैंल ल्योंळ
खिचडी प्रसाद कु स्वाद रलु वर्ष भर याद
लैंया पैंया बेलुक चल गल्यों फुलुक
हे बसन्ती
त्वै मनौण मां सारू साल बिति
ळोलि बग्वाल नौरत मण्डैण
बेेल बसन्ती तु कब होली दैंणा
मैंणा घिचि दे उफारी
दीदे माया की दुफारी
मेरी माया कु नीरू बोलिदे
मेरा सेंयां भाग कि गेड खोलिदे
दीदे जस का ज्यूंद्याल
तेरी डेलली छ समाल
पाठ बैठैन मैन लैन घड्याळ
तो भि नि खुलिन तेरि घिचि का ताळ
भिंडि सतौ न पितौ
मयालु मन न दुखौ
गैल दगड्या सौजड्यों का गैल
मेरि जिकुडि तेरि खुद मां कैल
दुन्यां हंसण सि पैलि
आस टुटण सि पैलि
आंख्यों मां सुपिन्या जिकुडि मां माया
तेरा नौ ज्यू जान य काया
सुपिन्या टुटण सि पैलि
आस छुटण सि पैलि
